Tamer abdo amin

كل المفروض مرفوض.. القلوب بتنفر تلقائياً من كل شيء مفروض على أصحابها حتى لو تقبلوه بشكل لحظي.. بالهداوة، واللين، والإقناع تقدر تاخد عين اللي قدامك.. بالفرض، والإجبار، وباستغلالك لخجل غيرك مش هتكسب..

الحاجات أقيم وطعمها أحلى لما بتيجي بالرضا، ومن نفسها، ولجل عيون اللي عايزها.

"اللهم أحسن إلى من أحسن إلينا".. ربنا يراضي كل واحد شاف فينا إعوجاج وصمم يعدله، أو كسر وقرر يجبرنا، أو هوّن علينا، أو طمنا.. يارب أرزقهم فضل، وخير، ونعمة وأنت خير الرازقين.

النية السودا فضاّحة وبتبان على الوش وتضلمه، والنية البيضا بتنور وش صاحبها وبتخليه متشاف محبوب، مستور، بشوش، والكل بيسعى للقُرب منه، وكسب رضاه.. إنما الأعمال بالنيات.. صلّح نيتك تنصلح دنيتك.

يارب يا كريم حوّل حالي من جميل لأجمل، وأمري من يسير لأيسر، وخطواتي من خير لـ خير.

ربنا يبعدنا عن أصحاب اللحظة، ويفرش طريقنا ناس مخلصة، تقّدر، تشيل في العين، وتكمل.

القلب الأبيض لا يتسخ، والواثق بالله لا يُكسر، ونقي النية لا يتوه، وصاحب السيرة الطيبة لا يموت، وقوي التوكل لا يُهزم، ومُلِح الدعاء لا يُخذل.

عندي حالة قرف لا محدود تجاه الفترة الزمنية دي، وحالة غضب جاب آخره من الناس ومن العالم كله.. كل كلام التصبير، والتهوين فقد معناه ومفيش غير الشعور بقلة الحيلة، والهوان.. كلنا بقينا محتاجين لعلاج نفسي من اللي بنشوفه.. حلها من عندك يارب يا كريم يا جبار فأنت حسبنا ونعم الوكيل.

"الناقص" بتفرسه وبتغيظه مميزات غيره مش عيوبهم.. نقاء الثوب يستفز ظلمات الآخرين.

أكتر من ٣ أسابيع كبرونا كلنا قبل الأوان وضربوا أعمارنا في ١٠٠ سنة على الأقل.. العيون شافت، والقلوب اتوجعت، والذاكرة حفظت اللي مستحيل هيتنسي مهما فات عليه وقت.. ﴿لَا يُكَلِّفُ اللَّهُ نَفْسًا إِلَّا مَا آتَاهَا ۚ سَيَجْعَلُ اللَّهُ بَعْدَ عُسْرٍ يُسْرًا﴾.. يارب.

الباب اللي يتقفل في وشك دوّر على باب غيره، والعين اللي تستصغرك إعميها، والقلب اللي يصدك تجاهله، والإيد اللي تعطلك إفلتها..

"دستويفسكي" قال: (لم يعد في العمر متسع لمزيد من الاشخاص الخطأ).

يارب في تلك الأيام الثقيلة ارزقنا صلاحاً لقلوبنا، وعافيةً لأرواحنا، وسلاماً لأفكارنا..اجعلنا أسعد خلقك، وأقرب عبادك إليك، وأغفر لنا ما مضى، وأصلح لنا ما بقى.. إننا نخاف فآمنا، ونتعثر فأقمنا، ونحاول فأوصلنا.

مفيش أمل في بني آدم.. تركناها لك يا الله في ثقة أن الأمور على خيرٍ ستُجريها.

﴿سَأُرِيكُمْ آيَاتِي فَلَا تَسْتَعْجِلُونِ﴾.. يارب هون علينا ثقل الأيام، وآنس أيامنا، وانقلنا من الضيق إلى السعة، ومن الحزن إلى الرضا، ومن طيات القلق إلى رحابة أمانك.

﴿رَبَّنَا وَلَا تُحَمِّلْنَا مَا لَا طَاقَةَ لَنَا بِهِ﴾.. يارب سبحانك عالم بكمية الضغوطات والصراعات اللي كل واحد فينا بيخوضها عشان يفضل واقف على رجليه.. عالم بالسعى، وعالم بعدم التقصير، وعالم باللي في النية.. كفى بك سنداً يا كريم.. ارزقنا "صبر" على قد الشيلة، و"حِمل" على قد القوة، و"قوة" مستمدة منك مش من بشر.

فيه جملة عظيمة بتقول: (البلاء مُعلق بالنطق به).. زى ما بتقول ولسانك بيكرر زى ما هتشوف.. شايفها مقفلة؟.. هتفضل مقفلة.. واثق إنها هتتدبر؟.. يبقى فعلاً هتتدبر ومن اتجاهات ماكانتش على بالك..

أقداركم توُخذ من أفواهكم.. حُسن الظن في ربنا هو اللي بيخلي القلوب أقوى، متحملة، ومكلمة.

﴿فَدَعَا رَبَّهُ أَنِّي مَغْلُوبٌ فَانتَصِرْ﴾.. يارب.

بقينا نخاف نبص على الأرقام اللي بتزيد بشكل مرعب وبيزيد معاها إحساسنا بقلة الحيلة.. كفاية كفاية كفاية يا عالم فجرة ماتعرفوش ربنا.. يارب حلها من عندك بقدرتك يا كريم.

فيه غيمة كآبة مضللة على الكل، ومحدش له نِفس لأى حاجة.. ربنا يزيح عن قلوبنا غبار اليأس، سدة النِفس، طبقة الصدر، قلة الحيلة، وكسرة الخاطر.

﴿لَا تَحْزَنْ إِنَّ اللَّهَ مَعَنَا﴾.. ولأن الله معك لا تحزن فكل كسر عندك، له جبر عنده.. يارب.

الناس المريحة كنز.. شكراً لكل حد علاقتي بيه مريحة، وخالية من الضغوط.

﴿وَمَا كَانَ رَبُّكَ نَسِيًّا﴾.. لا بينسى حقك، ولا بينسى تعبك، ولا بينسى دعواتك.. دايماً هتلاقيها محلولة من الكريم لإنه مابينساش، مابيظلمش، وبيعوض.